රජය කරන හොඳ දේට සහාය දෙන අතර වැරදි දේ පෙන්වා දෙන්න කටයුතු කරන බව සජිත් ප්‍රේමදාස මහතා මාධ්‍යවේදීන් හමුවේ කියා සිටියේය.
තමන් ඉදිරියටත් ජනතාවගේ සිතුම් පැතුම් අවබෝධ කරගෙන ජනතා අභිලාෂ ප්‍රගතිශීලි ආකාරයටත් රටේ ප්‍රශ්න විසඳෙන ආකාරයටත් කටයුතු කරන බවත් රජය ජනවරම ක්‍රියාත්මක කිරීමේ දී ජනතාවගේ පැත්තෙන් සුබවාදී සහ සහනදායී ක්‍රියා ක්‍රියාත්මක කරන්න සහයෝගය ලබා දෙන්නටත් එසේම යම් අඩුපාඩුවක් ඌනතාවක් රජයෙන් සිදු වුවහොත් එය පෙන්වා දෙන්නත් කටයුතු කරන බවත් විපක්ෂ නායක සජිත් ප්‍රේමදාස මහතා පැවසීය.
මේ කෙටි කාලයේ අඩුපාඩු සිදුවූ තැන් වැරදුණු තැන් සොයා බලන බවත් කණ්ඩායමක් ලෙස එකමුතුව සාමූහිකව කටයුතු කරන බවත් හෘද සාක්ෂියට අනුව දෙදහස් විස්ස පෙබරවාරි ආරම්භ වූ මේ පක්ෂයට ඉදිරි ගමනක් ඇති බවත් සාමූහිකත්වය රැකගෙන නව ගමනක් යන බවත් සජිත් ප්‍රේමදාස මහතා තවදුරටත් පැවසීය. මැද කොළඹ මෙන්ම යාපනය, කිලිනොච්චි දිස්ත්‍රික්කවලත් සාම්ප්‍රදායික දේශපාලනය පරාජයට පත් වුවත් ඉන් පාඩම් ඉගෙන ගෙන ඉදිරි ගමනක් යන බවත් වැඩපිළිවෙළක් ලෙසත් කණ්ඩායමක් ලෙසත් බහුතරයකගේ හිත දිනා ගන්න බැරි වූ බැවින් වැරදි අඩුපාඩු මඟහරවා ගන්නා බවත් පක්ෂයේ දෙවැනි පෙළ හැදීම ජනතාවගේ කැමැත්ත බැවින් ජනතාවගේ කැමැත්තට මුල්තැන දෙන බවත් සජිත් ප්‍රේමදාස මහතා පැවසීය.
